Këngëtarja e famshme me origjinë shqiptare, Bebe Rexha ka mbërritur ditën e sotme në Shqipëri.

Ajo udhëtoi nga ShBA-ja në Bubq të Fushë-Krujës për ta parë më nga afër situatën e vështirë që po kalon Shqipëria, si dhe për të takuar banorët e prekur nga tërmeti, për t’i siguruar ata që do t’iu vijë në ndihmë. Këngëtarja ishte shoqëruar nga aktori Bes Kallaku, si dhe këngëtarja Xhensila Myrtezaj.

Përmes një deklarate për mediat, këngëtarja u shpreh se pavarësisht famës që ka marrë nuk do ta harrojë kurrë origjinën e saj. Ndërsa theksoi se do të fillojë punën me ndërtimin e dy shtëpive, si dhe shprehu dëshirën për të kontribuar në ndërtimin e shkollave.

“Jam shumë mirënjohëse ndaj atyre që kanë shpëtuar jetën e shqiptarëve në rrënoja. Nuk ka rëndësi sa famë kam arritur, nuk do ta harroj asnjëherë nga vij; në venat e mia rrjedh gjak shqiptar, dhe do jem aty për Shqipërinë. Është koha të bëhemi bashkë. E dua vendin tim. Të dua Shqipëri”, u shpreh Rexha.